Respublika gününə həsr olunmuş rəsm əsərləri və əl işləri nümayiş edildi.

May ayının 27-də "Atəşgah" məbədində 3 saylı Uşaq İncəsənət məktəbi şagirdlərinin Respublika gününə həsr olunmuş rəsm əsərləri və əl işləri nümayiş edildi. Sərginin açılışında "Atəşgah" məbədinin direktoru Rəşid müəllim çıxış etdi. Nəzəriyyə müəllimi Salamova Təranə müstəqilliyimizin əldə olunması haqda məlumat verdi və rəsm sinifi şaqirdlərinin beynəlxalq müsabiqələrindəki uğurlardan danışdı. Məktəbin direktoru Respublikamızda II Ümumdünya Mədəniyyətlərarası dialoq forumunun keçirilməsilə əlaqədar sərginin 2 iyul tarixinədək nümayiş ediləcəyini tamaşaçıların diqqətinə çatdırdı.

Məlikova Könül və Bağırova Rəqsanə Ulu Öndər Heydər Əliyevin 90 illik yubileyinə həsr olunmuş sinif konsertlərini keçirdilər.

11 may tarixində 3 saylı Uşaq İncəsənət məktəbinin fortepiano müəllimləri Məlikova Könül və Bağırova Rəqsanə Ulu Öndər Heydər Əliyevin 90 illik yubileyinə həsr olunmuş sinif konsertlərini keçirdilər. Hər iki müəllim akt zalının tərtibatını Ümummilli Lider haqqında film nümayişini təşkil etmiş, şagirdlərinin həm solo, həm də müşayət etmələrini yaxşı hazırlamışlar. Tədbirin yüksək səviyyədə hazırladıqları üçün məktəbin direktoru Məlikova Könül, Bağırova Rəqsanə müəllimə və şagirdlərə öz təşəkkürünü bildirmiş və bu silsilə tədbirlərindən ən gözəl təşkil olunan tədbir kimi qeyd etdi. Sonda iştirakçılar üzərilərində zəhməti olan müəllimlərinə gül dəstələri təqdim etdilər.

Ümummilli Lider Heydər Əliyevin 90 illik yubileyinə həsr olunmuş konsert keçirildi.

8 may tarixində 3 saylı məktəbimizdə Ümummilli Lider Heydər Əliyevin 90 illik yubileyinə həsr olunmuş silsilə tədbirlərdən olan növbəti konsert keçirildi. Konsertdə nəfəsli alətlər şöbəsinin şagirdləri Azərbaycan və Qərb bəstəkarlarının əsərlərini ifa etdilər. Məktəbin nəzəriyyə müəllimi, silsilə konsertlərinin aparıcısı Təranə Salamova 6 may tarixində xalq çalğı alətləri şöbəsinin konsertində "Heydər Əliyev və Azərbaycan gəncləri", 7 may tarixində fortepiano şöbəsinin konsertində "Heydər Əliyev və Azərbaycan bəstəkarları", bu konsertdə isə "Heydər Əliyev və Azərbaycan mədəniyyəti" adlı məruzələrlə çıxış etdi.

Ulu Öndərin 90 illik yubileyinə həsr olunmuş konsert keçirildi.

30 aprel tarixində Səttar Bəhlulzadə adına Mədəniyyət Sarayında Heydər Əliyevin 90 illik yubileyinə həsr olunmuş 3 saylı Uşaq İncəsənət məktəbinin, Qobustan rayonu Təklə kənd Uşaq Musiqi məktəbinin, Qobustan şəhər İncəsənət məktəbinin birgə konserti keçirildi. Konsertin aparıcısı Təranə Salamova Heydər Əliyevin Azərbaycan mədəniyyəti üçün, Azərbaycan bəstəkarları üçün və gənc istedadlar üçün gördüyü əvəzsiz xidmətlərdən danışdı. Hər üç məktəbin şagirdləri maraqlı konsert proqramı ilə çıxış etdilər. Sonda məktəb direktorları Dəyanət Quliyev, Gülağa Cəbrayılov, Zaur Cəfərov xatirə hədiyyələrini təqdim edib müəllim və şagirdlərə, Səttar Bəhlulzadə adına Mədəniyyət Sarayının müdiriyyətinə öz təşəkkürlərini bildirdilər.